關於保險的一些事
細佬過身後，我地搵到佢之前買落既意外保險，然後去問下咩情況，都係名就唔開喇，純粹分享下。
份保險由2012年買落，一年幾千蚊個種好平既保險，所以佢都無乜同我地提過，當佢過身後，去銀行一問先知，原來佢2018年已經無供到份保險，係斷供一年之後，已經失效兼唔可以再補交返，正常講就係一蚊都拎唔返。
每一行都有佢條款同細則，依書直說的話，我都無怪職員，因為佢都幫我睇左好耐同打電話去中心問邊方面可以做到，但有時真係好無可奈可。
呢件事我分享少少野比大家聽，希望有用。
一，買左保險，記得話比家人知，最好就所有屋企人都知，萬一有事有人醒唔起都有其他人記得。
二，保險放好係一個地方，文件類既放埋一齊，有事起上黎可以搵到晒所有野。
三，受益人一定要寫，無寫既變成遺產承辦人去拎就會麻煩得多。
四，保險最好就自動過數，同埋有時轉左做電子帳單之類，無信去屋企就完全無人知要交款，有保險經紀相熟就比埋親人電話佢地，等有咩事搵唔到自己都好，都搵到屋企人。
同職員傾過，我同佢講細佬佢神智不清唔係唔想交，而係有時佢都處理唔到，又無人幫到佢，佢都好明白，話交低資料再申請下，盡力幫我地。
有時我諗，如果一個人住的話，突然有起事你處理唔到保險費用，又無人知你要做乜，都真係幾無奈。
買左保險既朋友，記得記得注意以上幾點，買保險都係想有個保障，留份心意姐，一個唔覺意有咁既情況一蚊都拎唔返的話，就唔係心意，而係心痛喇。
Search